ماذا يعني إدراج “الصكوك والسندات” في بورصة الكويت؟

• السندات أداة دين عبارة عن قرض مضمون غير شرعي

• الصكوك شهادة مشاركة بربح حلال مع تحمل مخاطر المشروع

بقلم – سلمان المعطش

شنو يعني إدراج “الصكوك والسندات” في بورصة الكويت؟ ​يا جماعة الخير، البورصة أعلنت عن خطوة تاريخية بتفعيل “أدوات الدخل الثابت”، هذا يعني أن السوق ما عاد بس “أسهم” تصعد وتنزل، صار فيه خيارات ثانية للي يبي يشغل فلوسه بذكاء وأمان أعلى.

السندات (Bonds) :​

– من منظور أهل المال والأعمال، السند هو “أداة دين”. الشركة أو الحكومة تطلب سيولة، فأنت تعطيهم “قرض”.

– ​شلون تشتغل؟ تعطي الشركة مثلاً 10,000 دينار، الشركة تلتزم قانونياً تعطيك “فائدة” ثابتة (مثلاً 5%) سنويًا.

– الأمان: السند يعتبر “دين” في رقبة الشركة، يعني لو الشركة خسرت، أنت لك الأولوية تاخذ فلوسك قبل المساهمين.

– ​المخاطرة: مخاطرها قليلة جداً على رأس المال، لكنها تُصنف “غير شرعية” لأنها قرض بزيادة مشروطة.

الصكوك (Sukuk) :

هذي هي “البديل الإسلامي”، وهي عبارة عن “شهادات مشاركة” في أصل أو مشروع حقيقي (مثل عقار، طائرات، أو بنية تحتية).

– ​شلون تشتغل؟ أنت ما تسلّف الشركة، أنت “تشتري حصة” في مشروعها. الربح اللي يوصلك هو نصيبك من أرباح تشغيل هذا المشروع.

– ​الأرباح: إذا المشروع ربح، تاخذ نسبتك (مثلاً 5%)

– إذا تعثر المشروع، ممكن النسبة تنزل أو ما تتوزع.

– ​المخاطرة: هنا النقطة الفنية؛ بما إنك شريك، فإذا “فشل” المشروع تماماً، ممكن رأس مالك يتأثر وينقص، لأنك شريك في الربح والخسارة مو مجرد مقرض.

مثال بالأرقام (مقارنة بين الاثنين)

– ​لو استثمرت 10,000 دينار لمدة 5 سنوات بربح 5 %​في السندات: راح تستلم 500 دينار كل سنة (ثابتة غصب: عن الشركة)، وفي نهاية الـ 5 سنوات ترجع لك الـ 10,000 دينار كاملة، (الشركة ضامنة للدين).

– ​في الصكوك: راح تستلم أرباح دورية (مثلاً كل 6 شهور) تعتمد على نجاح المشروع. لو المشروع “ناجح” تستلم الـ 500 دينار سنوياً، ولو المشروع “خسر” ممكن ما تستلم أرباح ورأسمالك الـ 10,000 دينار ممكن ينقص حسب قيمة المشروع الحالية.

ليش هالخطوة ممتازة لبورصة الكويت؟

​* توفير سيولة: الشركات تقدر تمول مشاريعها من جيوب المستثمرين بدل البنوك

* ​تنوع للمستثمر: اللي يخاف من “تذبذب” الأسهم، يروح للصكوك لأنها أهدأ وأضمن للدخل الدوري.

* ​الشفافية: كل شيء مراقب من هيئة أسواق المال والبورصة، والشركات اللي تطرح هالأدوات لازم يكون تصنيفها الائتماني قوي.

الخلاصة:​

* تبي “قرض مضمون” ومالك شغل بالخسارة؟ هذي السندات (لكنها غير شرعية).

* تبي “شراكة تجارية” حقيقية وربح حلال وتتحمل مخاطر المشروع؟ هذي الصكوك.